1. Melanio Ursos - ang kamagulangan- naimyo kang Insyang nga taga Bay-ang Ubay, Bohol. Namatay sa Manong Meling didto sa Ormoc City sa tuig 1958. Sukad mibalhin sila didto sa Ormoc, Leyte, wala na kami magkita ug wala nako ma trace pila ug kinsa ang ilang kabataan, ug hain sila karon. Dili nako malimtan si Manong Meling tungod sa kahans niya sa guitar ug pagkamaayo momanso sa kabayo nga wala pa ka kabay-e.
2. Francisca Ursos nga naminyo kang Demetrio Autor sa Bay-ang, Ubay, Bohol. Wala niya ikapadala kanako ang bahin sa iyang panimalay, apan naay usa sa iyang mga anak--si Chit Autor nga naminyo kang Arne Jensen nga taga Denmark. Hangtud karon atua sila manimuyo sa Denmark sukad sa ilang pagkaminyo sa 1965 (?).
3. Antonina Ursos nga naminyo kang Antonio Padilla nga taga isla sa Hingutanan, Ubay, Bohol. Kompleto ang lista sa iyang panimalay, apil na ang iyang mga apo nga 42 kabuok gikan sa onse (11) niya na mga kabataan. Dugay na siyang nabalo kang Antonio sa dihang naminyo siya pag-usab kang Rev. Dianala sa Tagum City, Davao del NOrte. Namatay na usab si Rev. Dianala, ug karon nag-inusara na lamang siya uban sa iyang kabanayan. Sukad sa iyang pagkaminyo kang Rev. Dianala, nahimo na usab siyang Pastor sa pipila ka kasimbahanang UCCP sa Davao del NOrte Conference.
4. Feliciano Ursos (si Pesing--kining tagsulat) nga natawo sa Mayo 23, 1935. Siya lamang sa doce ka mga igsoon nga nakahuman sa kolehiyo. Tungod sa kapobrihon, nanimpalad siya didto sa Dumaguete City, Negros Oriental, diin siya mihuman sa High School sa tuig 1957 sa Foundation College nga karon Foundation University na. Sa tuig 1962, ug pinaagi kanila ni Dr. Cipriano Navarro ug Dr. Gregorio Iyoy, nahimo siyang scholar sa Teodoro R. Yangco Memorial Foundation sukad sa upat ka tuig niya sa Bachelor of Arts hangtud nahuman siya sa Bachelor of Divinity sa Silliman University sa Dumaguete City sa Marso, 1969. Sa tuig 1972 iyang gidawat gikan kang Dr Lourdino Yuson nga nianang panahona maoy Dean sa Silliman University Dibinity School, ang diploma niya sa Master of Divinity. Sukad sa 1969 hangtud sa 2005 nag-alagad siya sa pipila ka kasimbahanang UCCP sa Negros District Conference, ug nahimo siyang Conference Minister sa NOrth Negros Conference sa 1997 hangtud 2002. Sa 1955 naminyo si Pesing kang Magdalena Dicen (Lina) nga Paulinian ug taga Sibulan, Negros Oriental, ug uban kang Lina natawo ang tulo nila ka mga anak: si Lida nga nakahuman sa Bachelor of Business Administration sa Silliman University,nga naminyo kang Nestor Cuaresma uban kinsa natawo ang tulo nila ka mga anak -- Ref Delaney nga karon coach sa Soccer Footbal Team sa usa ka University sa Manila; si Karl nga bag-o lang nakahuman sa Bachelor of Medical Technology ug nagreview pa alang sa ilang Board Exam sa umalabot September, 2012; ug si Chac Renus (Chuckie) nga college na sa Manila ug nagcoach sa Soccer Footbal team sa University diin siya, sa samang higayon (2012), nag-eskuela. Ang ikaduha nilang anak ni Pesing ug Lina --si Ligaya--nakahuman sa Bachelor of Medical Technology sa Silliman University, ug sukad sa iyang pagkahuman sa MedTech hangtud karon (2012) nagaalagad sa Siquijor Provincial Hospital ingon nga department head sa laboratory niini. Naminyo siya kang Rico Daniel nga taga Siquijor nga nag-alagad sa Opisina sa Governor of Siquijor. Aduna silay usa lamang ka anak --Sybil Ricci (Gogi) nga nagsugod pa sa iyang Bachelor of Medical Technology sa Silliman University. Ang ikatulo nilang anak ni Pesing ug Lina --Feliciano Jr (Jun)---nakahuman sa MedTech sa Silliman University (1983), ug sa iyang Doctor of Medicine gikan sa West Visayas State University sa Iloilo City (1987). Panahon sa upat niya ka tuig sa pag-eskuwela sa School of Medicine, scholar siya sa Pennsylvania Medical Mission Society sa America. Sa nagtrabaho siya sa Silliman University Medical Center bilang Internist, naminyo siya kang Rhanee Parrenas nga nagtubo sa California, USA. Si Jun ug si Chingling may duha ka anak-babaye nga kaluha--si Ciara Beatriz ug si Lauren Isabella nga karon anaa na sa Grade 8 sa Berkeley, California.
5. Margarito Ursos--nga natawo sa Agosto 26, 1936, naminyo kang Alfonsa Cagaoe, ug may usa lamang sila ka anak, si Margarito Ursos, Jr. Nabalo si Nitong ug naminyo kang Columba Bacariza, uban kang kinsa may upat sila ka mga anak---Si Rosie, si Artemio, si Raul, ug si Armando.
6. Jovita Ursos nga natawo sa Febrero 15, 1938, ug naminyo kang Catayas uban kang kinsa mau napulo sila ka mga anak: Wilfredo, Reynaldo, Edilberto Emmanuel, Danny, Rolando, Benny, Ligaya, Arturo ug Joel. Atua karon si Jovita manimuyo sa Saranggani Province, samtang kadaghanan sa iyang mga anak anaa sa South Cotabato.
7. Arsenia Ursos nga natawo sa Deciembre 14, 1940, naminyo kang Roque Tubo, uban kang kinsa natawo ang upat ka mga anak: si Eliza, Teresita, Ronnie, ug Ruel. Nabalo si Sening ug naminyo kang Vicente Conejo uban kang kinsa natawo ang upat usab ka mga anak: Ernesto, Juliet, Angelina, ug Marilyn.
8. Enrique Ursos nga natawo sa July 5, 1942, naminyo kang Pelagia Tubo uban kang kinsa natawo ang unom ka mga anak: Ranilo, Gerry, Belinda, Henry, Lorna, ug Dino. Anaa sila manginabuhi sa La Paz, Carmen, Davao del NOrte.
9. Jeremias Ursos nga natawo sa July 8, 1944, naminyo kang Leonora Cuyno uban kang kinsa aduna silay lima ka mga anak: Rene, Jerry, Randy, Ramil, ur Jenalyn. Namatay si Reming sa 2010 ug misunod kaniya si Leonora sa 2011. Anaa ang mga anak nanginabuhi sa Panabo City, Davao del Norte.
10. Rodulfo Ursos nga natawo sa Abril 6, 1946, naminyo kang Adoracion Catubig uban kang kinsa natawo ang tulo ka mga anak: Mary Ann, Peterly, ug si Jonathan.
11. Ruperto Ursos nga natawo sa December 24, 1948, namino kang Maura Beron uban kang kinsa natawo kining mosunod: Orlando, Marissa, Edwin, Maritess ug Rolly.
12. Ellie Ursos---ang kamanghoran sa doce ka mga igsoon, natawo sa October 24, 1950. Naminyo siya kang Ismael Manlangit uban kang kinsa natawo kining mosunod: Elaine, Maria Morena, Christopher, Mary Grace ug Angelo. Si Ellie lamang sa mga igsoon ni Pesing ang nakahuman ug High School. Pinaagi sa pagsuportar ni Pesing, ang kamanghorang anak ni Ellie---si Angelo "Boyet" Manlangit mi-graduate sa Bachelor of Theology sa Silliman University Divinity School sa Marso 2012. Pastor siya karon sa UCCP sa JImalalud, Negros Oriental.
Addendum:
Giandam kinig asoy sa kabanayan ni Engko Dorot ug ni Nang Inasya sa ikaupat nilang anak---si Pesing---nga tua na manimuyo sa Sacramento, California sukad pa sa 2007 sa gipetisyonan siya sa ikaduha niyang asawa---si Natividad---human si Pesing mabalo tungod sa kamatayon sa una niyang asawa nga si Lina niadtong July 26, 2002. Gikasal si Pesing ug si Naty sa October 20, 2007, sa Parkside Community Church, United Church of Christ, Sacramento, California, sa Pastor niini nga si Rev. Susan Hamilton.
